Adufe & Alguidar en Lugo
Xa falamos de Adufe & Alguidar cando se presentaron en Lugo, aquí deixo un vídeo daquel día.
Como a Tradescola cambiou a miña vida
Este verán desde a Tradescola, a escola de música tradicional que mantén a Asociación de Gaiteir@s Galeg@s na cidade de Lugo, propuxéronme que escribira un texto pequeno contando a miña experiencia persoal como alumno para unha publirreportaxe especial no xornal Sermos.
Cousa complicada. Falar de algo que atinxe a un mesmo non pode ser máis subxectivo, cada quen fala da feira como lle vaia nela. Así que comecei tirando de lembranzas de aquel primeiro ano. Como saía suando daquelas primeiras clases de canto e pandeireta. Non polo esforzo, non, a cousa non era para tanto. Costas molladas de suores fríos polos nervios. A metade de curso tiña claro que aquela ía ser a primeira e derradeira experiencia. Non pagaba a pena pasalo tan mal. Pero as cousas da vida son así, case sen decatarme, pasou aquel primeiro ano, e un segundo. E chegou a percusión e logo o baile e seguiron pasando anos e anos. E aquí seguimos intentando cada día aprender un pouco pero, sobre todo, intentando gozar dun patrimonio tan precioso e dunha experiencia que acabou cambiando a miña vida. En serio.
Tirando daqueles recordos, xurdiu este pequeno texto aparecido no número 147 do Sermos.
Se tes interese, podes consultar a publirreportaxe completa na seguinte ligazón A fondo147.
Estoupacaldeiros en 18 comidas
Os Estoupacaldeiros son un mítico grupo de Rábade (Lugo), famosos polas grandes festas que montan aló por onde van, mentras que 18 comidas é unha película do lucense Jorge Coira na que seis historias vanse misturando ao arredor dunha mesa e dun xantar, algo que ben sabemos facer por estas terras.
Aquí queda logo unha mostra de música tradicional galega nunha película dun lucense.
Bernardo Xosé vs Malvela: Peixinhos do mar
Composta por Lulu Santos e Nelson Motta, ten innumerables versións, unha das máis coñecidas a de Milton Nascimento. Mais nesta ocasión, a barallada musical é, entre a versión galepop de Bernardo Xosé, que acabaría formando parte de A Roda, e a versión das Malvela.
Fuliada na vila. A Maturrangaina
A nosa música tradicional ten unha riqueza tal que é quen de mesturarse con calquera outra e o resultado sempre é grandioso. Nos últimos anos xa temos visto combinacións que hai tempo serían impensables, proxectos que intentan darlle unha volta máis á riqueza no noso folclore, combinando gaita e piano, incorporar unha orquestra de cámara ou mesmamente unha orquestra de jazz, cun repertorio moi baseado na tradición.
Fuliada na vila é un proxecto que mestura a música jazz e a música tradicional galega. Partindo da tradición oral de dúas informantes como Rosa e Adolfina Casás, da Vila da Eirexa en Cerceda, familiares directas do director de escena, Richi Casás. Esa tradición queda vestida cunha roupaxe sonora, moi preta ao jazz o que lle da unha sonoridade moi especial.
As voces veñen do tradicional é son Branca ViÌlares, Carolina Vázquez e Pepa Yánez. A parte musical corre a cargo de Richi Casás (saxo soprano e percusión) José Ares (batería), Carlos Santos (baixo), Fran G.Galán (guitarra), Frank Barcia (acordeón), Xan Xove (gaita) e Pablo Pinto (zanfona e gaita).
A actuación corresponde ao concerto que deron no programa de Cultura Aberta 2016 da Deputación de Lugo.